Job 2

Ukulingwa Kwesibili KukaJobe

1 Kwelinye ilanga njalo izingilosi zaziletha phambi kukaJehova, loSathane laye weza lazo ukuziletha kuye. 2 UJehova wasesithi kuSathane, “Uvela ngaphi?” Wamphendula uJehova uSathane wathi, “Ngivela ekuzulazuleni emhlabeni ngihambahamba ngisiya le lale kuwo.”

3 UJehova wasesithi kuSathane, “Usuke wayinanzelela yini inceku yami uJobe? Kakho emhlabeni onjengaye; kalasici, uqondile, indoda emesabayo uNkulunkulu, exwaya okubi. Ulokhu emi kubo ubuqotho bakhe lanxa wangiqhubezela ukuthi ngimdilize kungelasizatho.”

4 USathane waphendula wathi, “Isikhumba ngesikhumba! Umuntu anganikela loba yini alayo ukusiza impilo yakhe. 5 Kodwa yelula isandla sakho umtshaye inyama lamathambo akhe, uzabona uzakuthuka ekukhangele.”

6 UJehova wathi kuSathane, “Kulungile, usezandleni zakho, kodwa ungayithinti impilo yakhe.”

7 Yikho uSathane wasesuka phambi kukaJehova wathela uJobe izilonda ezibuhlungu kusukela ngaphansi kufika esicholo sekhanda lakhe. 8 UJobe wasethatha ucezu lodengezi wazihwaya ngalo yena esehlezi esilotheni.

9 Umkakhe wathi kuye, “Ulokhu ubambelele kubo ubuqotho bakho na? Mthuke uNkulunkulu uzifele!”

10 Waphendula wathi, “Ukhuluma njengomfazi oyisiwula. Sizakwamukela okuhle kuNkulunkulu singalwamukeli uhlupho na?” Kukho konke lokhu uJobe kenzanga isono ngakutshoyo.

Abangane BakaJobe Abathathu

11 Kwathi abangane bakaJobe abathathu, u-Elifazi umThemani, uBhilidadi umShuhi loZofa umNamathi, sebezwile ngazo zonke izinhlupho ezazimwele basuka emakhaya abo bahlangana bavumelana ukuthi bahambe bayomqinisa bamduduze.

12 Bathi bembona besesebucwala kabaze bamazi; baqhinqa isililo, badabula izambatho zabo, bathela uthuli emakhanda abo.

13 Basebehlala phansi laye okwezinsuku eziyisikhombisa lobusuku obuyisikhombisa. Kakho kubo owatsho ulutho kuye ngoba babona ubuhlungu obukhulu ayebuzwa.